ସ୍ପଷ୍ଟ ଜନାଦେଶ ପରେ ବି ଗଠନ ହୋଇପାରୁନି ମହାରାଷ୍ଟ୍ର ସରକାର । ରେଜଲ୍‌ଟ ବାହାରିବାର ୫ ଦିନ ପରେ ମଧ୍ୟ ମହାୟୁତି ନିଜର ନେତୃତ୍ବ ସ୍ଥିର କରିପାରୁ ନାହାନ୍ତି । କିଏ ହେବେ ମୁଖ୍ୟମନ୍ତ୍ରୀ? ଏନେଇ ସସପେନ୍ସ ଲାଗି ରହିଥିବା ବେଳେ ବସୁଛି ଘନ ଘନ ବୈଠକ । ଗତକାଲି ବିଳମ୍ବିତ ରାତି ପର୍ଯ୍ୟନ୍ତ ଅମିତ ଶାହଙ୍କ ସହ ବୈଠକ କରିଥିଲେ ମହାରାଷ୍ଟ୍ର ପୂର୍ବତନ ମୁଖ୍ୟମନ୍ତ୍ରୀ ଏକନାଥ ସିନ୍ଧେ ।ମୁଖ୍ୟମନ୍ତ୍ରୀ ପଦରୁ ପଛକୁ ହଟି ବଦଳରେ ଏକନାଥ ସିନ୍ଦେ ବର୍ତ୍ତମାନ ବିଜେପି ହାଇକମାଣ୍ଡଙ୍କ ଠାରୁ ଏକ ବଡ ଦାବି କରିଛନ୍ତି। କେନ୍ଦ୍ର ମନ୍ତ୍ରୀ ଅମିତ ଶାହାଙ୍କୁ ଭେଟିବା ପରେ ଏକନାଥ ସିନ୍ଦେ ଶିବସେନାଙ୍କ ପକ୍ଷ ଉପସ୍ଥାପନ କରିଥିଲେ ଏବଂ ୧୨ ଟି ମନ୍ତ୍ରୀ ପଦ ସହିତ ବିଧାନ ପରିଷଦ ଅଧ୍ୟକ୍ଷ ପଦବୀ ଦାବି କରିଥିଲେ।କୁହାଯାଉଛି ଯେ ଏକନାଥ ସିନ୍ଦେ ଗୃହ ମନ୍ତ୍ରଣାଳୟ, ନଗର ଉନ୍ନୟନ ସମେତ ଅନେକ ଗୁରୁତ୍ୱପୂର୍ଣ୍ଣ ବିଭାଗ ପାଇଁ ଦାବି କରିଛନ୍ତି। ଏଥି ସହିତ ମନ୍ତ୍ରୀ ପଦ ବଣ୍ଟନ ବେଳେ ଶିବସେନା ପ୍ରତି ଯଥେଷ୍ଟ ସମ୍ମାନ ରକ୍ଷା କରିବାକୁ ଅମିତ ଶାହାଙ୍କୁ ଅନୁରୋଧ କରିଛନ୍ତି ସିନ୍ଧେ । ତେବେ ବୈଠକରେ ମହାରାଷ୍ଟ୍ରର ଉପମୁଖ୍ୟମନ୍ତ୍ରୀ ପଦବୀ ନେଇ କୌଣସି ନିଷ୍ପତ୍ତି ନିଆଯାଇ ନାହିଁ। ତେବେ ମନ୍ତ୍ରିମଣ୍ଡଳରେ ସାମିଲ ହେବେ ଏକନାଥ ସିନ୍ଧେ । ସେପଟେ ପ୍ରଧାନମନ୍ତ୍ରୀ ମୋଦି ଏବଂ ଗୃହମନ୍ତ୍ରୀ ଅମିତ ଶାହା ଯାହା ସ୍ଥିର କରିବେ, ତାକୁ ତାଙ୍କ ଦଳ ଗ୍ରହଣ କରିନେବେ ବୋଲି କହିଛନ୍ତି ସିନ୍ଧେ ସେନା । ଏହାପୂର୍ବରୁ ଗତକାଲି ଶିବସେନା ମୁଖ୍ୟ ଏକନାଥ ସିନ୍ଧେ, ବିଜେପି ନେତା ଦେବେନ୍ଦ୍ର ଫଡନାଭିସ୍, ଏନସିପି ମୁଖ୍ୟ ଅଜିତ ପାୱାର ଏବଂ ମେଣ୍ଟର ଅନ୍ୟାନ୍ୟ ନେତାମାନେ କେନ୍ଦ୍ର ଗୃହମନ୍ତ୍ରୀ ଅମିତ ଶାହା ଏବଂ ବିଜେପି ରାଷ୍ଟ୍ରୀୟ ସଭାପତି ଜେପି ନଡାଙ୍କୁ ଭେଟି ବୈଠକ କରିଥିଲେ ।ସୂଚନାଯୋଗ୍ୟ ଯେ ୨୮୮ ଆସନ ବିଶିଷ୍ଟ ମହାରାଷ୍ଟ୍ର ବିଧାନସଭାରେ ବିଜେପିକୁ ଏଥର ରେକର୍ଡ ସର୍ବାଧିକ ୧୩୨ ଆସନ ମିଳିଥିବା ବେଳେ ଏକନାଥ ସିନ୍ଦେଙ୍କ ଶିବସେନାକୁ ମିଳିଛି ୫୭ । ଅଜିତ ପାୱାରଙ୍କ ଏନସିପି ୪୧ଟି ଆସନ ହାତେଇଛି । ମ୍ୟାଜିକ୍ ନମ୍ବର ୧୪୫ଠାରୁ ଢେର ଆଗରେ ମହାୟୁତି ।